Tattvaratnāvalokaḥ
Technical Details
tattvaratnāvalokaḥ
om namaḥ śrīsadgurupādebhyaḥ|
anupamasukharūpī śrīnivāso'nivāso
nirupamadaśadevīrūpavidyaḥ savidyaḥ|
tribhuvanahitasaukhyaprāptikāro'vikāro
jayati kamalapāṇiryāvadāśāvikāsāḥ||1||
śrīmantranītigatacārucaturthaseka-
rūpaṃ vidanti nahi ye sphuṭaśabdaśūnyam|
nānopadeśagaṇasaṃkulasaptabhedai-
steṣāṃ sphuṭāvagataye kriyate prayatnaḥ||2||
saṃbhrāntabodhā nikhilā hi tīrthyā-
stattvasya sādhyasya ca rūpavittau|
tebhyaḥ prakṛṣṭaḥ kila tattvavettā
vedāntavādīti [jana] pravādaḥ||3||
ānandarūpaṃ svavidaprakampyaṃ
vedāntinaḥ sādhyamuṣanti sāntam|
saśrāvakākhaḍgajināśca sādhya-
micchanti rūpādyupadhervirāmam||4||
ākāraśūnyaṃ gaganendurūpaṃ
pratyātmavedyaṃ karuṇārasaṃ ca|
sallakṣaṇairbhūṣitamarthakāri
dānādiniṣyandamapetasaukhyam||5||
sānandasallakṣaṇamaṇḍitāṅgaṃ
saṃbhujyamānaṃ daśabhūmisaṃsthaiḥ|
sattvārthakāri pravadanti sādhyaṃ
dānadiṣaṭpāramitānayasthā||6||
saṃpūrya dānādiguṇānaśeṣān
saṃbuddhya kṛtyaṃ sakalaṃ ca kṛtvā|
yabhdūtakoṭeḥ karaṇaṃ ca sākṣāt
sādhyaṃ tadapyasti nirodharūpam||7||
svābhāṅgaṇā(nā)śleṣi tadarthakāri
duḥkhaiḥ sukhaiścaiva vimuktirūpam|
aśītyanuvyañjanabhūṣitāṅga-
mapetakalpaṃ pravadanti sādhyam||8||
svadevatākāraviśeṣaśūnyaṃ
prāgeva saṃbhāvya sukhaṃ sphuṭaṃ sat|
mahāsukhākhyaṃ jagadarthakāri
cintāmaṇiprakhyamuvāca kaścit||9||
kṛtvā sākṣāt svādhipaṃ sātarūpaṃ
paścāt tyaktvā sātamātraṃ phalaṃ syāt|
śuddhaṃ sākṣācchakyate naiva kartuṃ
tenākāro bhāvitaḥ svādhipasya||10||
gagaṇasamaśarīraṃ lakṣaṇairbhūṣitāṅgaṃ
nirupamasukhapūrṇaṃ svābhayā saṃgataṃ ca|
sphuradamitamunīndraḥ sarvasattvārthakāri
pravadati punaranyaḥ sādhyamucchedaśūnyam||11||
kṛtvā sākṣāt svādhipaṃ sātarūpaṃ
bhāvopekṣājñānamātraṃ phalaṃ syāt|
āsaṃsārasthāyi sattvārthakāri
cintāratnaprakhyamekāntaśāntam||12||
kṛtvā sākṣānmaṇḍalaṃ sātarūpaṃ
paścāttasya svecchayā nirvṛtiṃ ca|
sattvārthasyāpyastyabhāvo na vāsmin
prādurbhāvo nirvṛtādasti yasmāt||13||
kṛtvā sphuṭaṃ rūpamabhīṣṭameṣāṃ
paścānnirodhaṃ phalamāha kaścit|
abhinnarūpaśca yato nirodho
na pakṣabhede'pi tato'sti bhedaḥ||14||
prajñājñānāduttaraṃ bodhicittā-
svādasturyaṃ seṣa(ka)māhāvaraṃ tat|
yasmāt sarvo bhāvanāsu prayāso
vyarthaḥ prāptastatphalasya prasiddheḥ||15||
prajñājñānāduttaraṃ prāptarāmā-
svādasturyaṃ sekamāhādhamaṃ tat|
yasmāt sarvo bhāvanādau prayatno
buddhoddiṣṭo niṣphalaḥ saṃprasaktaḥ||16||
dambholibījaśrutidhautaśuddha-
pāthojña(ja)bhūtāṅkurabhūtapuṣṭi|
turīyaśasyaṃ paripākameta(ti)
sphuṭaṃ caturthaṃ viduṣo'pi gūḍham||17||
pañcapradīpāmṛtabinducandra-
bhrūmadhyabindudbhavamaṇḍalāni|
vāyoḥ svarūpaṃ galaśuṇḍikādya-
matattvarūpaṃ svayamūhanīyam||18||
svapnendrajālapratibimbamāyā-
marīcigandharvapurāmbucandraiḥ|
anyaiśca sarvairupamābhidheyai-
rnaivā'sti sādhyaṃ kathitādihānyat||19||
gambhīraśūnyapratibhāsamātra-
śāntātisūkṣmānabhilāpyaśabdaiḥ|
nirlepanī[rū]panirañjanādyai-
rbhrāntirna kāryā'parasādhyasattve||20||
||tattvaratnāvalokaḥ samāptaḥ||
kṛtiriyaṃ paṇḍitavāgīśvarakīrtipādānām||